काठमाडौं । अवैध रुपमा स्यानिटाइजर तथा कस्मेटिक सामानहरु बनाई बिक्री वितरण गरी कालोबजारी तथा ठगी गरेको अभियोगमा २ जनालाई मंगलबार दिउँसो प्रहरीले पक्राउ गरेको छ ।
पक्राउ पर्नेहरुमा काठमाडौं महानगरपालिका-१६ खुसिबु बस्ने भारत बनारसका ६५ वर्षीय अब्दुल मनान र काठमाडौं महानगरपालिका-१४ कलंकी ठेगाना भएका ३३ वर्षीय प्रदिप उपाध्याय लुईटेल रहेकाे प्रहरीले जनाएको छ ।
काठमाडौं महानगरपालिका-१६ नयाँबजार खुसिबुमा अवैध रुपमा गुणस्तरहीन मानव स्वास्थ्यमा असर पर्ने ह्याण्ड स्यानिटाइजर तथा कस्मेटिक मालसामानहरु तयार गरी बिक्री वितरण गरिरहेको भन्ने सूचनाको आधारमा महानगरीय अपराध महाशाखा टेकुबाट खटिएको प्रहरीले उनीहरुले बजारमा अत्याधिक माग भएका ह्यान्ड स्यानिटाईजर लगायत विभिन्न कस्मेटिक सामान नक्कली उत्पादन गरी बिक्री बितरण गर्न तयार पारी भण्डारण गरी राखेको अबस्थामा फेला पारी उनीहरुलाई पक्राउ गरेको हो ।
साथै उनीहरुले विभिन्न प्रख्यात ब्राण्डहरु डिफेन्स लुकअप, ब्रोदर ब्रुउक्स, रुबिया ह्यान्ड वास, बिई वन एडभान्स, जेमिनि ह्रान्ड वास, ग्रिलिसिरिन मेगेनटा, Qye ink Mycle लगायतका स्टिकरहरु आफैले छपाई गरी खाली बोतलहरुमा लेभलिङ तथा महंगो मुल्य समेत राखि दुरुस्त सक्कली ब्राण्ड जस्तै बनाई बजारमा अबैध रुपमा बिक्री बितरण गर्ने गरेको खुल्न आएको प्रहरीले बताएको छ ।
उनीहरुले कोभिड-१९ जस्तो महामारीबाट बच्न प्रयोग गरिने स्यानिटाइजर, विभिन्न ब्राण्डका स्याम्पु र विभिन्न ब्राण्डका नक्कली फेस क्रिम लगायतका नक्कली कस्मेटिक सामानहरु समेत उत्पादन गर्ने गरेको अनुसन्धानबाट खुल्न आएको महाशाखाले जनाएको छ ।
उनीहरुको साथबाट बिभिन्न साईजको प्लाष्टिकको ग्यालेन तथा ड्रममा राखेको स्यानिटाइजर बनाउन प्रयोग हुने कच्चा पदार्थ तथा अन्य कस्मेटिक कच्चापदार्थ प्रहरीले बरामद गरेको छ ।
