धनुषा । जिल्लाको सबैलामा गए राति मोटरसाइकल दुर्घटनामा परी चार जना बालकको मृत्यु भएको छ। सोही दुर्घटनामा एक जना घाइते भएका छन्।
सबैला नगरपालिका–१२ बरकुर्वामा राति ८ः३० बजेतिर ज६प ६७३९ नंको मोटरसाइकल आफैं अनियन्त्रित भई दुर्घटना हुँदा मोटरसाइकलमा सवार पाँचमध्ये चार जनाको मृत्यु भएको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक जितेन्द्रकुमार बस्नेतले जानकारी दिए।
दुर्घटनामा परी सबैला नगरपालिका–२ का १५ वर्षीय राहुल यादव, १२ वर्षीया लक्ष्मी यादव, बौका भनिने विकास यादव र १४ वर्षीय सुमित यादवको मृत्यु भएको प्रहरीले जनाएको छ। दुर्घटनामा परी गम्भीर भएका घाइतेलाई उद्धार गरी उपचारका लागि प्रादेशिक अस्पताल जनकपुरधाम पुर्याए पनि चार जनाको मृत्यु भएको प्रहरी नायब उपरीक्षक बस्नेतले बताए।
सोही दुर्घटनामा सबैला–२ निवासी १९ वर्षीय सुरेन्द्र यादव पनि घाइते भएको र उनको प्रादेशिक अस्पतालमै उपचार भइरहेको प्रहरीले जनाएको छ। दुर्घटनाको कारण खुल्न नसकेको र घटनाबारे थप अनुसन्धान भइरहेको बस्नेतले बताए।
