मलेसिया । मलेसियामा चासोक तङनाम साँझ २०७९ सम्पन्न भएकोछ । किराँत याक्थुम चुम्लुङ मलेसियाको आयोजनामा डिसेम्बर १८ तारीखमा मलेसियाको राजधानी क्वालालम्पुरमा चासोक तङनाम साँझ २०७९ सम्पन्न भएको हो ।
उक्त कार्यक्रममा प्रमुख अतिथिको रुपमा मलेसियाका लागि नेपाली राजदुत डिल्ली राज पौडेलको उपस्थिति रहेको थियो । सो अवसरमा बोल्दै राजदूत पौडेलले मलेसियामा रहेका नेपालीको समस्या र चुनौतिहरुको समाधान र न्युनिकरण गर्न ‘टास्क फोर्स टिम’ निर्माण गरेको बताएका छन् । मलेसियामा नेपालीहरुको लागि खुल्ला गरिएका श्रमका पाँच वटा सेक्टर मध्य केही सेक्टरमा नेपाली श्रमिकहरुको लागि समस्या रहेकाले उक्त टास्क फोर्सले माग-पत्र प्रमाणीकरणको प्रक्रियामा कडाई गरेकोसमेत बताए । जसकारण माग-पत्र प्रमाणीकरणमा ढिलाई भएकोले सम्बन्धित पक्षलाई धैर्यधारण गर्न आग्रह उनलेे गरे ।
नेपाल मलेसियाको लागि महंगिएको एयर टिकेटको मुल्य कम गर्न, मलेसियाबाट बिरामी, अलपत्र परेका नेपाली र मलेसियामा ज्यान गुमाएका नेपालीहरुको शब सहज नेपाल लैजानको लागि नेपाली राजदुतावास मलेसियाले नेपाल एयरलाइन्सका टिमसंग बैठक बसी समन्वय गर्ने गरेकोले यसको कार्यनयन छिटै नै हुने र जसले गर्दा समस्या समाधानमा सहज हुने राजदुत पौडेलले उल्लेख गरे ।
मन्तब्यको क्रममा राजदुत पौडेलले नेपालको संस्कृति र सांगेतिक पहिचानलाई प्रबर्द्धन र सम्बर्द्धन गरेकोमा कार्यक्रम आयोजक, प्रायोजक, कलाकार र पत्रकारहरुलाई धन्यबाद ज्ञापन गरेका थिए । प्रवासमा यस्ता प्रकारको एकता र सहकार्य आवश्यक रहेको बताउदै दुतावासको सधै सहकार्य रहने प्रतिबद्धता जाहेर गरे ।
गैरआवसिय नेपाली संघ मलेसियाका अध्यक्ष बिनोद थापा, ब्यवसायी संघ मलेसियाका अध्यक्ष ईन्द्र लिम्बू, नेपाल मगर संघका महासचिव राम प्रसाद पुन लगायतले कार्यक्रममा मन्तव्य राखेका थिए ।
किराँत याक्थुम चुम्लुङ मलेसियाका अध्यक्ष दिल केरुङ लिम्बूको सभापतित्वमा सम्पन्न उक्त कार्यक्रमको अवसरमा लिम्बू जातीय खानाको परिकार खुवाईएको थियो भने विभिन्न कलाकारहरुले लिम्बू तथा नेपाली गित संगित प्रस्तुत गरेका थिए ।
