गोरखा, २ माघ । अजिरकोट गाउँपालिकाका अध्यक्ष दीपक देवकोटाले ‘एक सहकारी, एक उत्पादन’ अभियानमार्फत स्थानीय विकास र आत्मनिर्भरतालाई नयाँ गति दिने योजना अघि सारेका छन्।
आदर्श बहुउद्देश्यीय सामुदायिक विकास सहकारी संस्थाको १९औं वार्षिक साधारण सभा तथा छैटौं अधिवेशन उद्घाटन गर्दै उनले सहकारीलाई ग्रामीण विकासको आधार बनाउँदै उत्पादनमूलक व्यवसाय र स्थानीय रोजगारी सिर्जनामा केन्द्रित गरिने बताए।
अध्यक्ष देवकोटाले सहकारीलाई जनताको साझा संस्था भन्दै यसलाई उत्पादनका माध्यमबाट आर्थिक उन्नति गर्ने अभियानका रूपमा अघि बढाउन गाउँपालिका प्रतिबद्ध रहेको बताए। उनले भने, ‘सहकारीलाई नमुना रूपमा विकास गर्दै, स्थानीय उत्पादनहरूको ब्रान्डिङ र बजारीकरणमा जोड दिनेछौँ।’
गाउँपालिकाले स्थानीय उत्पादनमा आधारित कार्यक्रमहरू जस्तै कोदाको रक्सी, किवी खेती, ओलाङमा तत्काल होमस्टे सञ्चालन, र उत्पादनमूलक व्यवसाय प्रवर्द्धन गर्न सहकारीमार्फत अनुदान उपलब्ध गराउने योजना अघि सारेकाे बताए। ‘यसले न केवल रोजगारी सिर्जना गर्छ, उत्पादित सामग्रीलाई राष्ट्रिय र अन्तर्राष्ट्रिय बजारमा पुर्याउन मद्दत गर्दछ,’ उनले थपे।
अध्यक्ष देवकोटाले सहकारीप्रति जनतामा रहेको नकारात्मक धारणा बदल्ने आवश्यकता औँल्याए। गाउँपालिकाले सहकारी व्यवस्थापन सुधार्न कडा नीति अवलम्बन गरेको दाबी गर्दै उनले खराब कर्जा भएका सहकारीलाई अनुशासनमा ल्याउने, ऋण नतिर्नेहरूको पालिकाबाट प्रवाह हुने सेवा रोक्ने, र, पुस महिनाभित्र सबै सहकारीलाई अद्यावधिक गर्न निर्देशन दिएको दाबी गरे।
कार्यक्रममा अध्यक्ष देवकोटाले नम्कि-भिरकुना-खरिबोट-वडा कार्यालय सडक तत्काल पिच गर्ने प्रतिबद्धता जनाए।
गाउँपालिकाका सबै टाेल तथा गाउँमा केन्द्रीय प्रसारण लाइन पुग्ने भन्दै स्थानीय स्तरमा उत्पादित हाइड्रोलाई केन्द्रीय प्रसारण लाइनमा जोड्न सहजीकरण गर्न आफू तयार रहेको बताए । उनले भने-‘आगामी केही समयभित्र अजिरकाेटका हरेक टोल र गाउँमा केन्द्रीय प्रसारण लाइन पुग्छ। तर, यहाँ तपाइहरूले उत्पादन गर्नु भएको हाइड्रोलाई केन्द्रीय प्रसारण लाइनमा जोड्न चाहनुहुन्छ भने स्थानीय सरकारले त्यसलाई सहजीकरण गर्न तयार छ ।’
स्थानीय सरकारलाई एक मेगावाट क्षमताका हाइड्रो पावरको अनुमति प्रदान गर्ने कानुनी व्यवस्था छ ।
२०६३ सालमा स्थापना भएको आदर्श बहुउद्देश्यीय सामुदायिक विकास सहकारी संस्थाले ११ वटा साना सहकारी संस्थालाई मातहतमा राख्दै, हालसम्म करिब ३ करोड रुपैयाँ लगानी गरेका स्थानीय शेयर सदस्यहरूलाई प्रत्यक्ष फाइदा पुर्याएको छ।
