सञ्जय मिश्रा
रौतहट – रौतहटको पश्चिमीभेग फतुवा विजयपुर नगरपालिका अन्तर्गत क्रसर उद्योगीको चलेको टिपर आतंकविरूद्ध स्थानीय जुटेका छन्।
उनीहरूले टिपर आतंह रोक्न प्रदेश सरकारदेखि स्थानीय प्रशासनको ध्यानाकर्षण गराएका छन्।
नगरक्षेत्र अन्तर्गत सञ्चालनमा रहेको तीन वटा क्रसर उद्योगबाट निस्किने दर्जनौं टिपरले आतंक मच्चाएको भन्दै शिवपुजन यादवको नेतृत्वमा स्थानीयले इलाका प्रहरी कार्यालय विजयपुरका प्रमुख इन्स्पेक्टर इन्द्रमणि अधिकारीलाई बिहीबार ज्ञापन पत्र बुझाएका हुन्।
स्थानीय प्रहरी कार्यालयमा बुझाइएको ज्ञापन पत्र इमेलमार्फत् मधेश प्रदेश सरकार,जिल्ला प्रशासन कार्यालय रौतहट र जिल्ला प्रहरी कार्यालय रौतहटमा पठाइएको स्थानीय यादवले जानकारी दिए। फतुवा विजयपुर-८ बंकुल हिमालिवास रोडमा महालक्ष्मी सैंड वासिङ उद्योग, सोही ठाउँमा सुमुख क्रसर एण्ड वासिङ उद्योग, वडा १०-स्थित माँ कंकाली क्रसर एण्ड वासिङ गरी तीन वटा क्रसर उद्योग सञ्चालनमा छन्।
जंगलछेउका गाउँ राङ्गी, बुटावा, भैंसही र हिमालिबास गाउँनजिकै लाखौं टिपर नदीजन्य सामग्री उद्योगहरूले भण्डारण गरी राखेका छन्। दैनिक बिहान ३ बजेदेखि सोही भण्डारण र लालबकैया नदीबाट चोरीलुकी ३० वटा टिपरमा मिक्स ग्रेभल ओभरलोड गरी तीब्र गतिमा राति ९ बजेसम्म तीन वटै उद्योगमा ढुवानी गर्ने गरेको ज्ञापन पत्रमा उल्लेख गरिएको छ।
‘यसरी ६ वर्षदेखि उद्योगीहरूले मिक्स ग्राभल ढुवानी गर्दै आएको सर्वविदितै छ। वडा-११ सहिद चौक बजार हुँदै उद्योगसम्म दैनिक अनियन्त्रित रूपमा कुदिरहेको ओभरलोड टिपरको भारले मुख्य सडकको कैयौं स्थानको कालोपत्रे ग्राभलमा परिणत भएको छ। तीब्र गतिमा हिँड्ने टिपरले बाटोमा उडाएर अँध्यारो बनाउने गरेको कारण अन्य सवारी साधन चलाउने तथा पैदल यात्रीमा दुर्घटनाको ठूलो जोखिम बढेको छ,’ ज्ञापन पत्रमा भनिएको छश्र
धुलो उडेर पसल तथा घरमा राखिएको खानेकुरा धुलाम्य हुने, धुलोले बाटोमा हिँड्ने अवस्था नरहेको, धुलोको कारण कतिपय मानिसमा स्वासप्रश्वासको समस्याबाट ग्रसित भएको स्थानीयले बताए।
त्यस्तै मिक्स ग्रेभल भण्डारण स्थलदेखि उद्योगसम्म जाने बाटोमा रहेका सात वटा सामुदायिक विद्यालयका चार हजार बालबालिका दुर्घटनाको जोखिममा रहेको ज्ञापन पत्रमा उल्लेख गरिएको छ। त्यति मात्र नभई अनियन्त्रित टिपरले चर्को आवाजले हर्न बजाउँदा ती विद्यार्थीको पठन-पाठनमा समेत असर पारिरहेको छ।
मधेस प्रदेश सरकारले नदीजन्य पदार्थ संकलन र उपभोगका लागि कार्यविधि २०७५ बनाएको छ।
बिहान ६ बजेदेखि बेलुकी ६ बजेसम्म ढुवानी गर्ने र सो अवधिमा सडकमा दैनिक पानी लगाउनुपर्ने, धुलो नउडाई टिपरमा ओभरलोड नगर्ने, बजार स्कुल र गाउँ क्षेत्रभित्र १५ देखि २० को गतिमा हर्न नबजाई ढुवानी गर्ने कार्यविधिमा उल्लेख गरिएको छ।
तर उद्योगीहरूले कार्यविधिको कुनै वास्ता नगरी विपरीत गर्दै टिपर आतंक सिर्जना गरेको स्थानीयको भनाइ छ। केही समयअघि तीव्र गतिमा रहेको टिपरको ठक्करबाट मोटरसाइकल चालक फतुवा विजयपुर-९ का ५५ वर्षीय खेदु चौधरीको घटनास्थलमै मृत्यु भएको थियो।
त्यस्तै, गत ५ गते एउटा तीव्र गतिमा रहेको ओभरलोड टिपरको टायर विजयपुर बजार क्षेत्रमै पड्किँदा गिट्टी-ढुङ्गा उछिट्टिएर ६ जना घाइते बनाएको ज्ञापन पत्रमा भनिएको छ। तथापि, प्रदेश सरकारको कार्यविधि अनुसार टिपर सञ्चालन सहज बनाउन ज्ञापन पत्रमार्फत् माग गरिएको छ।
‘चार दिनभित्र माग पूरा नभएमा टिपरको ढुवानी सेवा बन्द गरी बाध्य भएर सडक आन्दोलनमा उत्रने छौं र केही अप्रिय भएमा त्यसको जिम्मा नियमनकारी निकायले लिनुपर्ने छ,’ ज्ञापन पत्रमा भनिएको छ।
यादवको नेतृत्वमा रामउद्धार साह, राजनारायण साह, प्रेम शंकर साह, रामस्वार्थ महतो, नरेन्द्र साह, राजकुमार साह, सहिन्द्र साह, रामनारायण साह, जगरुल महमद, सरयुग साह, उपेन्द्र यादव, जोगी राय यादव लगायत दुई दर्जन भन्दाबढी मानिस इलाका प्रहरी कार्यालय विजयपुर पुगेका थिए।
फतुवा विजयपुरस्थित सञ्चालन रहेका तीनमध्ये एउटा क्रसर वर्तमान प्रदेश सरकारका मन्त्रीको, अर्को उद्योग उनको आफन्तको रहेको र तेस्रो एक जना माओवादी पार्टीका नेताको रहेको कारण लामो समय देखि मनपरी गर्दै आएको दाबी गाउँलेले गरेका छन्।
