क्वालालम्पुर । मलेसियाले विगत १० महिनादेखि प्लान्टेसन र सुरक्षा गार्ड बाहेक अन्य क्षेत्रमा वैदेशिक कामदारको भर्ना स्थगन गरेपछि नेपाली आप्रवासी कामदारहरूलाई मलेसिया अवैधानिक रूपमा प्रवेश गराउन मानव तस्करहरूले थाईल्यान्डको मार्ग प्रयोग गर्न थालेका छन्।
मानव तस्करहरूले नेपाली नागरिकलाई भिजीट भिसामा थाईल्यान्ड लगेर, त्यहाँबाट गोलोक नदी पार गरी मलेसियाको केलान्तान राज्यमा डुङ्गाबाट तस्करी गरिरहेका छन्।
कठोर सीमाना जाँच र निगरानीको बाबजुद, तस्करहरूले रान्ताउ पान्जाङ नाका दुरुपयोग गरिरहेका छन्। मलेसियास्थित नेपाली दूतावासका अनुसार, केही नेपाली तस्करीमा परेर निकै जोखिमपूर्ण परिस्थितिमा पुगेका छन्।
मलेसियाका श्रमिक सम्बन्धी काम गर्ने एजेन्सीहरू समेत यो अवैधानिक प्रक्रियामा संलग्न देखिएका छन्। यता, नेपालबाट पनि एजेन्टहरूले गाउँगाउँमा भ्रम फैलाएर काम पाउने प्रलोभन देखाई नेपालीहरूलाई मलेसिया पठाउने काम तीव्र बनाएका छन्।
त्यस्ता घटनाहरूले नेपाली युवाहरूको भविष्य जोखिममा पार्नुका साथै उनीहरूको परिवार पनि आर्थिक र मानसिक संकटमा पर्ने अवस्था आएको छ।
नेपाली दूतावास मलेसियाका अनुसार थाईल्यान्ड हुँदै अवैध रूपमा मलेसिया प्रवेश गर्ने नेपालीहरूको संख्या बढ्दो छ, यद्यपि यकिन तथ्याङ्क भने छैन। केहीले जोखिम मोलेर मलेसियामै काम गरिरहेका छन्।
अधिकारि र दूतावासले नेपालीहरूलाई यस्ता अवैधानिक बाटो नअपनाउन चेतावनी दिएका छन्, किनभने यसले जेल सजायदेखि देश निकाला र ठूलो आर्थिक क्षति पुर्याउन सक्छ।
सरकार र सरोकारवालाबीच समन्वय गरी मानव तस्करी विरुद्ध सशक्त कदम चाल्नु आजको आवश्यकता बनेको छ।
