काठमाडौ। उद्धार गरिएको तीन महिनासम्म पनि घिमिरेको मोडल तथा कलाकार निशा घिमिरेको स्वास्थ अवस्थामा अपेक्षित सुधार नआएको नर्भिक अस्पतालले जनाएको छ ।
अस्पतालले मंगलबार पत्रकार सम्मेलन गरेर उद्धार गरिएको तीन महिनासम्ममा घिमिरेको उपचारमा ५० लाखभन्दा धेरै खर्च भइसकेको र अस्पतालमा उपलब्ध सबै प्रविधि, सिप र विधिको प्रयोग गरी उपचार गरे पनि स्वास्थ्य अवस्था स्थिर रुपमा रहेको जनाएको छ ।
घिमिरेको उपचारमा संलग्न डाक्टर पंकज जलानका अनुसार दुर्घटनाका कारण उनलाई ब्रेन इन्जुरी भई अवस्था जटिल भएकाले अब पूर्ण रुपमा सामान्य हुने सम्भावना छैन । लामो समय उपचारविहीन अवस्थामा बसेकाले अहिले आएर कोसिस गरिएपनि अपेक्षित रुपमा घिमिरेको स्वास्थ सुधार हुन नसकेको डाक्टर जलानले बताए ।
त्यसैगरी नर्भिक अस्पतालकी प्रबन्ध सञ्चालक मेघा चौधरीले पनि स्वास्थ अवस्था यस्तै रहने हो भने घिमिरेलाइ राम्रो रिहाब सेन्टरको खाँचो पर्ने देखिएको बतइन् । र, त्यस विषयमा पनि आफूले सोचिरहेको विज्ञप्तीमा उल्लेख गरेकी छन् ।
फिल्म पढ्न भारत गएकी घिमिरे देहरादूनमा सडक दुर्घटनामा परी घाइते भएकी थिइन् । सुरुवातमा भारतमै उपचार गरिएपनि आर्थिक रुपमा उपचार खर्च धेरै पर्ने देखिएपछि बाबुआमाले उनलाई नेपालमै ल्याएका थिए ।
नेपालमा पनि तीन महिना ट्रमा सेन्टरमा उपचार गरिएपनि उनको स्वास्थमा सुधार नआएपछि चिकित्सकहरुकै सल्लाहअनुसार उपत्यकाका विभिन्न थेरापी सेन्टरहरूमा लगातार थेरापी गरिएको थियो । त्यसपछि भने कोरोना महामारी शुरु भयो र परिवारलाई थेरापी खर्च जुटाउन समेत मुस्किल पर्न थाल्यो जसका कारण केही समय घरमै अर्धचेत अवस्थामा थन्किएकी थिइन् ।
जेठ २७ गतेका दिन केहि समाजसेवकिो सहयोगमा मेघा चौधरीले निशा घिमिरेको उद्धार गरेकी थिइन् । जतिबेला घिमिरेको शरीरको तौत २० केजी मात्रै थियो । उनको उपचारमा लाग्ने सम्पूर्ण खर्च पनि चौधरीले नै व्यहोर्दै आएकी छिन् ।
