काठमाडौं – नेपाली संगीत बजारमा भर्खरै मात्र ‘अन्तिम इच्छा’ बोलको नयाँ म्युजिक भिडियो सार्वजनिक भएको छ। प्रेमिल जोडीहरुको जीवनमा आइलागेको दुखद परिस्थितिलाई समेटेर यो म्युजिक भिडियो तयार पारिएको छ।
भिडियोमा पूजा शर्मा र पुष्प खड्कालाई जोडीको रुपमा देखाइएको छ। सेण्टिमेण्टल भर्सनको यस गीतमा किरण पुन्ज स्वर रहेको छ भने राजेन्द्र वाइबाको शब्द, संगीत र संगीत संयोजन रहेको छ। बुद्ध थापाले छायाँकन गरेको यस भिडियोमा विकाश धमलाको सम्पादन रहेको छ।
निकेश खड्काको निर्देशनमा तयार पारिएको यस भिडियोलाई ‘ओएसआर डिजिटल’ नामक युट्युव च्यानल मार्फत सार्वजनिक गरिएको हो।
२०५८ साल देखि आफ्नो संगीत यात्रा सुरु गरेका गायक पुन्जले २०६६ सालमा ‘किरण’ नामक एल्बम प्रकाशित गरेका थिए। हाल शास्त्रीय गायनका प्रशिक्षकका रुपमा कार्यरत पुन्जले यस भिडियोलाई हेरेर प्रतिक्रिया दिन सबैलाई आग्रह गरेका छन्।
